الرئيسية
السلام عليكم و رحمة الله وبركاته
يا رهيف القلب
.... .... .... .... .... .... ....
يا رهيف القلب عذّبني وفاك ... من عرفتك و أنت صابر ما شكيت !
يا حبيب النور .. و النور بصفاك ... يكتب آمالك و أنا جيته ... و محيت
عالية آمالك تنوّر سماك ... عالية، و أنا على آمالك وطيت
من برودي، ما تعنيت لرضاك ... همي غروري ! و بغروري اكتفيت !
يا رقيق الطبع، طبعك في عطاك ... تعطي و ما أذكر ولا مرة خذيت
تشفي جروحي ، تلحفها بدفاك ... تروي عروقي، و أنا عنك سليت
تحفظ حروفي و ترسمني ملاك ... تبتدي لأجلي، و أنا منك انتهيت !
كم رسمت خطوط دربك للهلاك ! ... و كم طعنتك و أنت غافل ما دريت !
كم كذبت وقلت لك ما من سواك ... يسكن بقلبي ولا لغيرك عطيت !
صرت أردد هالقصايد من وراك ... و أنت ما تدري عن اللي لك نويت
خنت أنا مليون مرة في هواك !... قلت لك اهجر مكاني ،، و ما قويت !
قلت لك يكفي ولاظني كفاك ... قلت لك لا تبني آمال ،، و بنيت !
من يقول إني رويتك في ضماك !... من يقول إني لجرحك ما سعيت
خنتك البارح و أرخصت بغلاك ... و أنت تحسبني مع احساسك وفيت !
ميت فيني ضميري ، وش رجاك ؟! ... من ضمير ميت في قلب ميت ؟!
هاك قلبي ، هاك أسراري ، و هاك ... دفتر أشعاري ، و قلّي وش لقيت
شوف وش فيها ياعلّك أو عساك ... تلقى فيها لـ ( الوفا )، لو نص بيت !
يا رهيف القلب يكفيك اللي جاك !... و يكفي بحقك خطاي و ما جنيت
...
..
